Шавкат Мирзиёев ишки ислер органлары жумысларын сынға алды

Шавкат Мирзиёев ишки ислер органлары жумысларын сынға алды

Өзбекистан Республикасы Президенти Шавкат Мирзиёев басшылығында 9-февраль күни ишки ислер органлары жумысы, системада орын алған машқала ҳәм кемшиликлер, алдағы ўазыйпаларға арналған видеоселектор жыйналысы болды. Бул ҳаққында ЎзА хабар бермекте.

Илажда Өзбекистан Республикасы Ишки ислер министрлиги, тийисли министрлик ҳәм мекемелер басшылары, Қарақалпақстан Республикасы Жоқарғы Кеңеси баслығы, ўәлаятлар, Ташкент қаласы, қалалар ҳәм районлар ҳәкимлери қатнасты.

Президент Шавкат Мирзиёев ғәрезсизликтиң дәслепки жылларынан елимизде қәўипсизлик ҳәм турақлылықты тәмийинлеў, жәмәәт тәртибин сақлаў ўазыйпаларына баслы әҳмийет берилип атырғанын айрықша атап өтти. Бул профилактика, тез-излеў, тергеў, жол ҳәрекети қәўипсизлиги, өрт қәўипсизлиги, қорықлаў, патруль-пост хызметлери, айрықша ўазыйпаларды орынлаўшы шақырыў отрядлары қайтадан шөлкемлестирилгенинде, ишки ислер органларының материаллық-техникалық базасы турақлы беккемленип атырғанында көринбекте.

Кейинги ўақытлары ҳуқықбузарлықтың алдын алыў, жынаятшылыққа қарсы гүресиў, жәмәәт тәртибин сақлаў, пуқаралардың ҳақ-ҳуқықларын қорғаў, жәмәәтшилик пенен байланысларды еле де беккемлеў бағдарындағы жумыслар жаңа басқышқа шығып атырғанын айтты.

Президентимиз бүгин ишки ислер органлары заман талапларына қәншелли жуўап берип атырғанына итибар қаратты. Инсан мәплери менен байланыслы мәселелерди кешиктирместен шешиў керек болған бүгинги күнде ескише пикирлеў, жумысты ески «қәлип»лерге тийкарланып шешиў, өз ўазыйпасын елге хызмет принципине тийкарланып емес, ал жеке мәплеринен келип шығып орынлаў сыяқлы әмелиятлар даўам етпекте.

Ишки ислер органлары халық мәмлекеттен разы болатуғындай етип ислеўи керек. Бирақ, айырым орынларда олардың жумыслары адамлардың наразылықларына себеп болмақта. Әсиресе, мал-мүлкке жынайый топылыў сыяқлы жағдайларға толық шек қойылмаған. Қастан дене жарақатын жеткериў, таўламашылық, жол транспорт жағдайлары кемеймеген.

Президент жынаятларды ашыў бағдарында да кемшиликлер бар екенлигин айтты. Атап айтқанда, урлық ҳәм таўламашылық пенен байланыслы жынаятлардың ҳәр бесеўиниң биреўи ашылмаған.

Жынаят-излеў жумысында сезилерли кемшиликлер ушыраспақта, айырым орынларда ҳуқықты қорғаў мекемелери ортасындағы бирге ислесиў талап дәрежесинде емес. Излеўде жүрген айырым шахслардың усланбай атырғаны оларға жынайый ислерин даўам еттириўге мүмкиншилик береди ҳәм бул оғада тәшўишли жағдай есапланады.

Мәмлекетимизде исбилерменлер ҳуқықын қорғаў айрықша итибар берилмекте. Президентимиз ишки ислер органларының исбилерменлик жумысына нызамға қарсы түрде араласыўы ямаса тоскынлық етиўи сыяқлы жағдайларға шек қойыў керек екенлигин айрықша атап өтти.

Мәмлекетимиз басшысы ҳәптениң пийшемби күнин жынаятшылықтың алдын алыў ҳәм профилактика күни, деп жәриялаўды усыныс етти. Усы күни аймақлардағы прокурорлар ҳәм ишки ислер басқармалары баслықлары жергиликли телеканалларда шығып, исленген жынаятлар, олардың келип шығыў себеплери, алдын алыў бойынша илажлар ҳәм профилактикасы ҳаққында мағлыўмат береди.

Президентимиз сын талқылаў, қатаң тәртип-қағыйда ҳәм жеке жуўапкершилик ҳәр бир басшы жумысының күнлделикли қағыйдасы болып қалыўы, машқалаларды кабинетте отырып емес, ал халық арасында жүрип анықлаўға ҳәм олардың шешимин табыўына қаратыў, жуўмақлаўшы нәтйиже ушын басшылардың жеке жуўапкершилигин арттырыў, тараўды тәжирийбели кадрлар менен тәмийинлеў, жумыстағы ҳәр қандай унамсыз жағдайлардың алдын алыў ҳәм бундай иллетлер тамырын қурытыў – ишки ислер органларының баслы ўазыйпасы екенин айрықша атады.

Аўдарма: makan.uz

Фото: ЎзА
скачать dle 10.6фильмы бесплатно



  • 10-02-2017, 09:24 |
  • 837