Исбилерменлик субъектлерине мәмлекетлик хызметлерди көрсетиў механизмлерин жетилистириўге байланыслы қосымша илажлар ҳаққында Өзбекистан Республикасы Президентиниң Қарары

Исбилерменлик субъектлерине мәмлекетлик хызметлерди көрсетиў механизмлерин жетилистириўге байланыслы қосымша илажлар ҳаққында Өзбекистан Республикасы Президентиниң Қарары

Соңғы жыллары елимизде жеке меншикти исенимли қорғаў, киши бизнес ҳәм жеке исбилерменликти жедел раўажландырыўды тәмийинлеў бойынша қолайлы шараятлар жаратылды.
Исбилерменлик структураларына мәмлекетлик хызметлер көрсетиў сапасын ҳәм олардан пайдаланыў имканиятларын түп-тийкарынан арттырыўға байланыслы комплексли шөлкемлестириўшилик-ҳуқықый илажлар көрилди.
Район ҳәм қалаларда шөлкемлестирилген исбилерменлик субъектлерине «бир айна» принципи бойынша мәмлекетлик хызметлер көрсететуғын бирден-бир орайлар (буннан былай — «бир айна» орайлары) тәрепинен заманагөй мәлимлеме-коммуникация технологияларын кеңнен енгизе отырып, дизимнен өткериў, рухсат бериў ҳәм лицензиялаў тәртип-қағыйдаларынан өтиўдиң жәриялылығын тәмийинлеў бойынша салмақлы жумыслар әмелге асырылмақта.
Соның менен бирге, бул салада әмелге асырылған жумыслардың талқыланыўы исбилерменлик субъектлерине мәмлекетлик хызметлерди көрсетиў механизмлерин буннан былай да жетилистириў, «бир айна» орайларын нәтийжели басқарыў, олардың жумысын шөлкемлестириўде ҳәм муўапықластырыўда системалы қатнасты және олардың басқа да мәмлекетлик структуралар менен өз-ара бирге ислесиўин белгилеў зәрүрлигин көрсетпекте.
Исбилерменлик субъектлерине мәмлекетлик хызметлер көрсетиўдиң сапасын ҳәм жәриялылығын, олардан пайдаланыў имканиятларын буннан былай да арттырыў, исбилерменлердиң ҳуқықлары менен нызамлы мәплерин қорғаў кепилликлерин күшейтиў және орынларда халық пенен тиккелей пикирлесиўдиң нәтийжелилигин тәмийинлеў мақсетинде:
1. Қарақалпақстан Республикасы Министрлер Кеңеси, ўәлаятлар ҳәм Ташкент қаласы ҳәкимликлери, Өзбекистан Республикасы Әдиллик министрлиги, Экономика министрлиги, Мәлимлеме технологияларын ҳәм коммуникацияларын раўажландырыў министрлиги, Саўда-санаат палатасының «бир айна» орайларын район (қала) ҳәкимликлери структурасынан Өзбекистан Республикасы Әдиллик министрлигине өткериў ҳаққындағы усынысы қабыл етилсин.
Банклер ҳәм кредит бюролары, олардың филиалларынан ҳәм ўәкилханаларынан тысқары барлық исбилерменлик субъектлерин мәмлекетлик дизимнен өткериў «бир айна» орайлары тәрепинен әмелге асырылатуғыны белгиленсин.
2. Өзбекистан Республикасы Әдиллик министрлигине төмендеги қосымша ўазыйпалар жүкленсин:
«бир айна» орайлары жумысы үстинен улыўмалық басшылықты әмелге асырыў, соның ишинде, олардың материаллық-техникалық базасын беккемлеў, «бир айна» орайлары хызметкерлериниң маманлығын арттырыў;
«бир айна» орайлары арқалы мәмлекетлик хызметлерди көрсетиўде ўәкилликли уйымлар тәрепинен нызамшылыққа әмел етилиўи үстинен қадағалаўды тәмийинлеў, олардың басшыларына анықланған ҳуқықбузарлықлар, бундай жағдайларға алып келетуғын себеплерди ҳәм шараятларды сапластырыў ҳаққында көрип шығылыўы зәрүр болған усыныслар киргизиў;
«бир айна» орайларының, мәмлекетлик уйымлардың ҳәм басқа да шөлкемлердиң исбилерменлик субъектлерине мәмлекетлик хызметлерди көрсетиў бойынша жумыс нәтийжелилигин, бул процесске заманагөй мәлимлеме-коммуникация технологияларының енгизилиўин системалы түрде талқылаў;
алдынғы халықаралық тәжирийбени есапқа ала отырып, «бир айна» орайлары арқалы мәмлекетлик хызметлер көрсетиў саласындағы нызамшылықты ҳәм ҳуқықты қолланыў әмелиятын жетилистириўге байланыслы усыныслар таярлаў.
3. Исбилерменлик субъектлерине мәмлекетлик хызметлер көрсетиў саласындағы жумысты муўапықластырыў бойынша республикалық комиссия (буннан былай — Респубикалық комиссия) 1-қосымшаға муўапық қурамда дүзилсин.
Төмендегилер Республикалық комиссиясының тийкарғы ўазыйпалары етип белгиленсин:
мәмлекетлик хызметлер, соның ишинде, «бир айна» орайлары арқалы көрсетилип атырған хызметлердиң сапасын ҳәм жәриялылығын, олардан пайдаланыў имканиятларын арттырыўға қаратылған шөлкемлестириўшилик, ҳуқықый және басқа да илажларды ислеп шығыў және әмелге асырыў;
мәмлекетлик хызметлер көрсетиў саласында мәмлекетлик уйымлардың ҳәм басқа да шөлкемлердиң жумысын муўапықластырыў ҳәм өз-ара бирге ислесиўин тәмийинлеў;
мәмлекетлик хызметлер көрсетиў саласындағы жумыслардың жағдайын системалы түрде талқылаў;
саладағы машқалаларды анықлаў, мәмлекетлик хызметлер көрсетиў системасын жетилистириўге ҳәм исбилерменлик жумысын раўажландырыўға байланыслы усыныслар ислеп шығыў ҳәм әмелий илажлар көриў, соның ишинде, бундай илажларды орынларда халық пенен тиккелей пикирлесиў арқалы көриў.
4. Республикалық комиссия еки ҳәпте мүддетте:
Республикалық комиссияның жумыс ислеў тәртибин ислеп шықсын ҳәм тастыйықласын;
Қарақалпақстан Республикасы, ўәлаятлар ҳәм Ташкент қаласы, районлар менен қалалардағы исбилерменлик субъектлерине мәмлекетлик хызметлер көрсетиў саласындағы жумысты муўапықластырыў бойынша аймақлық комиссияларды (буннан былай — аймақлық комиссиялар) дүзсин ҳәм олардың жумысын шөлкемлестирсин.
Аймақлық комиссияларға тийислисинше Қарақалпақстан Республикасы, ўәлаятлар ҳәм Ташкент қаласы прокурорлары басшылық ететуғыны белгиленсин.
5. Өзбекистан Республикасы Әдиллик министрлиги қурамында штат бирликлери улыўма санының шеңберинде Юридикалық шахсларды мәмлекетлик дизимнен өткериў басқармасы негизинде Мәмлекетлик хызметлер көрсетиўди муўапықластырыў ҳәм раўажландырыў басқармасы, Қарақалпақстан Республикасы Әдиллик министрлиги, ўәлаятлар ҳәм Ташкент қалалық әдиллик басқармаларында болса, тийислисинше оның бөлимлери дүзилсин.
Өзбекистан Республикасы Әдиллик министрлиги Мәмлекетлик хызметлер көрсетиўди муўапықластырыў ҳәм раўажландырыў басқармасы ҳәм оның орынлардағы бөлимлери Республикалық комиссияның ҳәм аймақлық комиссиялардың жумысшы уйымы етип белгиленсин.
6. Төмендегилер:
2017-жылы тек «бир айна» орайлары арқалы көрсетилетуғын қосымша мәмлекетлик хызметлерди енгизиў кестеси 2-қосымшаға муўапық;
2018-2020-жыллары басқышпа-басқыш енгизилетуғын, тек «бир айна» орайлары арқалы көрсетилетуғын мәмлекетлик хызметлердиң дизими 3-қосымшаға муўапық тастыйықлансын.
7. Өзбекистан Республикасы Министрлер Кабинети:
бир ай мүддетте 2017-жылы тек «бир айна» орайлары арқалы көрсетилетуғын қосымша мәмлекетлик хызметлерди енгизиў кестесин әмелге асырыў бойынша илажлар режесин;
еки ай мүддетте 2018-2020-жыллары тек «бир айна» орайлары арқалы көрсетилетуғын мәмлекетлик хызметлерди басқышпа-басқыш енгизиў кестесин;
2017-жылдың 1-сентябрине шекем 2018-2020-жыллары тек «бир айна» орайлары арқалы көрсетилетуғын мәмлекетлик хызметлерди басқышпа-басқыш енгизиў кестесин әмелге асырыў бойынша илажлар режесин ислеп шықсын ҳәм тастыйықласын.
2- ҳәм 3-қосымшаларда белгиленген, тек «бир айна» орайлары арқалы көрсетилетуғын мәмлекетлик хызметлерди енгизиўге байланыслы илажлардың өз ўақтында ҳәм сапалы орынланыўы бойынша министрликлер менен ведомстволардың басшыларына жеке жуўапкершилик жүкленсин.
8. Берилген, тоқтатып қойылған, қайта тикленген, қайта рәсмийлестирилген, бийкар етилген, сондай-ақ, әмел етиў мүддети жуўмақланған рухсатнама ҳәм лицензиялар ҳаққындағы мағлыўматларды «Лицензия» мәлимлеме системалары комплекси шеңберинде алыў имканиятын жаратыў жолы менен «бир айна» орайлары арқалы қағаз түринде берилетуғын арнаўлы бланкалардағы рухсатнамаларды ҳәм лицензияларды мәжбүрий рәсмийлестириў талабы 2018-жылдың 1-январынан баслап бийкар етилсин.
9. Өзбекистан Республикасы Мәлимлеме технологияларын ҳәм коммуникацияларын раўажландырыў министрлигиниң, Экономика министрлигиниң ҳәм Әдиллик министрлигиниң 2017-жылдың 8 шерегинде төмендегилерди тәмийинлейтуғын «Лицензия» мәлимлеме системалары комплексин иске түсириў ҳаққындағы усынысы мақуллансын:
«бир айна» орайлары арқалы мәмлекетлик хызметлерди көрсететуғын мәмлекетлик уйымлар ҳәм басқа да шөлкемлер тәрепинен исбилерменлик жумысы саласындағы руқсат бериўши ҳүжжетлер ҳәм лицензиялар (буннан былай — рухсатнамалар ҳәм лицензиялар) алыў ҳаққындағы арзаларды қабыл етиў;
исбилерменлик субъектлери ушын қолайлы түрде рухсатнамалар ҳәм лицензиялар алыў тәртиби ҳәм мүддетлери ҳаққындағы мағлыўматлардан аралықтан турып пайдаланыў;
исбилерменлик субъектлери тәрепинен рухсатнамалар ҳәм лицензиялар алыў ҳаққында электрон усылда арза бериў имканиятын жарата отырып, исбилерменлик жумысы саласындағы рухсат бериў ҳәм лицензиялаў тәртип-қағыйдаларын автоматластырыў;
исбилерменлик субъектлери «бир айна» орайлары арқалы көрсетилип атырған мәмлекетлик хызметлер бо¬йынша қай жерде ҳәм қандай тәризде мүрәжат етилгенине қарамастан, рухсатнамалар ҳәм лицензиялар алыў ҳаққындағы арзаларды көрип шығыўдың барысын ҳәм нәтийжесин бақлаў имканияты;
рухсатнамалар ҳәм лицензиялар реестрлеринен мағлыўмат алыў имканияты.
10. 2-қосымшада көрсетилген «бир айна» орайлары арқалы мәмлекетлик хызметлерди көрсетип атырған ўәкилликли уйымлар:
Өзбекистан Республикасы Мәлимлеме технологияларын ҳәм коммуникацияларын раўажландырыў минис¬трлиги, Әдиллик министрлиги ҳәм Саўда-санаат палатасы менен биргеликте бир ай мүддетте ведомстволараралық электрон бирге ислесиў арқалы усынылатуғын мағлыўматлардың толық дизимин белгилесин ҳәм гөнерген және заман талапларына жуўап бермейтуғын ҳүжжетлерди ҳәм мағлыўматларды исбилерменлик субъектлери тәрепинен усыныў ҳаққындағы талапларды бийкар етиўге байланыслы усынысларды Министрлер Кабинетине киргизсин;
белгиленген мүддетлерден баслап Кестеге киргизилген мәмлекетлик хызметлерди көрсетиў ҳаққындағы арзаларды тиккелей исбилерменлик субъектлеринен қабыл етиў әмелиятын бийкар етсин;
мәмлекетлик хызметлер көрсетиў саласындағы нызамшылықты ҳәм ҳуқықты қолланыў әмелиятын жетилистириўге байланыслы системалы илажлар көрсин.
11. Исбилерменлик субъектлерин дизимнен өткериў ушын мәмлекетлик бажы сыпатында алынатуғын барлық қаржылар ҳәм «бир айна» орайлары арқалы көрсетилетуғын мәмлекетлик хызметлер ушын төленетуғын мәмлекетлик бажылар ҳәм жыйымлар көлеминиң 10 проценти муғдарындағы қаржылар «бир айна» орайы жумысын қаржыландырыў дәреги сыпатында Өзбекистан Республикасы Әдиллик министрлигиниң атына ашылған арнаўлы жеке есап бетине өткерилиўи және келип түсип атырған қаржылар «бир айна» орайларын сақлаў, олардың материаллық-техникалық базасын беккемлеў, хызметкерлердиң мийнетине ҳақы төлеў ҳәм оларды хошаметлеўге бағдарланатуғыны белгиленсин.
12. Қарақалпақстан Республикасы Министрлер Кеңеси, ўәлаятлар ҳәм Ташкент қаласы ҳәкимликлери Өзбекистан Республикасы Әдиллик минис¬трлиги, Өзбекистан Республикасы Меншиклестириў, монополиядан шығарыў ҳәм бәсекиликти раўажландырыў мәмлекетлик комитети менен биргеликте «бир айна» орайларының мәмлекетлик мүлки болған барлық имаратларды ҳәм объектлерди оларға тийисли әсбап-үскенелер, ҳүжжетлер ҳәм басқа да мүлк Қарақалпақстан Республикасы Әдиллик министрлиги, ўәлаятлар ҳәм Ташкент қалалық әдиллик басқармаларына белгиленген тәртипте тегин усынылатуғынын тәмийинлесин.
13. Өзбекистан Республикасы Әдиллик министрлиги Бас прокуратура, Экономика министрлиги, Қаржы министрлиги, Мәлимлеме технологияларын ҳәм коммуникацияларын раўажландырыў министрлиги, Саўда-санаат палатасы менен биргеликте еки ай мүддетте Министрлер Кабинетине нызам ҳүжжетлерине усы қарардан келип шығатуғын өзгерислер менен қосымшалар ҳаққында усыныслар киргизсин.
14. Усы қарардың орынланыўын қадағалаў Өзбекистан Республикасының Бас министри А.Н. Ариповқа ҳәм Өзбекистан Республикасы Бас прокуроры И.Б.Абдуллаевқа жүкленсин.

Өзбекистан Республикасы Президенти Ш.МИРЗИЁЕВ.

Ташкент қаласы, 2017-жыл 1-февраль.

Мағлыўмат erkinkarakalpak.uz дан алынды


Фото: Anons.uz
скачать dle 10.6фильмы бесплатно



  • 9-02-2017, 14:10 |
  • 188