Президентимиз Шавкат Мирзиёев Шымбайда

 

Президентимиз Шавкат Мирзиёев Шымбайда

 

Президентимиз Шавкат Мирзиёев Қарақалпақстанға сапарын Шымбай районындағы 8-санлы мектепке шекемги билимлендириў мекемесинен (бала бақша) баслады. Бул ҳаққында ЎзА хабар бермекте.

Мәмлекетимиздиң басшысы сапарын балалар бақшасынан баслағанында үлкен мәни бар. Президентимиз өзиниң ҳәр бир шығып сөйлеўинде ҳәм аймақларға сапарын мектепке шекемги билимлендириў сапасын арттырыў, мектепке шекемги билимлендириў мекемелеринде балаларды мектепке сапалы таярлаўды түпкиликли жақсылаў, тәлим-тәрбия процессине жәҳан әмелиятында кең қолланылатуғын заманагөй тәлим бағдарламаларын ҳәм технологияларын енгизиў басламасын алып шықпақта ҳәм бул бағдарда әҳмйиетли ўазыйпаларды қоймақта.

Президентимиздиң дәл усы тараў бойынша қабыл еткен қарар ҳәм пәрманларының орынланыўы бойынша Қарақалпақстанда да кең көлемли жумыслар әмелге асырылмақта. 318 мектепке шекемги билимлендириў мекемеси жумыс ислеп атырған болып, олардың 3 еўи жеке, 7 еўи түрли шөлкемлер басқарыўында. Оларда 48 мың 106 бала, улыўма балалардың 32% тәлим-тәрбия алмақта.

Президент барған бақша 140 орынға арналған болып, 1992-жылы ашылған. 37  педагог ҳәм тәрбияшы оларға ғамхорлық етпекте.

Мәмлекетимиз Президенти бақшада балаларға жаратылған шәраятлар менен танысты, тәрбияланыўшыларды жақынлап қалған Жаңа жыл байрамы менен қутлықлады.

- Мектепке шекемги тәрбия системасына итибар қаратып атырғанымыз тосыннан емес, - деди Шавкат Мирзиёев. Жаслар тәрбиясына бүгиннен баслап итибар бермесек ертең кеш болыўы мүмкин.

Президентимиз балалардың аўқатланыў рационы менен қызықты.

- Мектепке шекемги билимлендириў мекемелерин Қарақалпақстанның ықлым шәраятларынан келип шығып қурыў керек, - деди Президент. Ҳәр бир хананы ысытылатуғын пол менен тәмийинлеў зәрүр. Буннан тысқары бул сала ушын кадрлар таярлаў системасын да қайта көрип шығыў керек. Буның ушын жоқары оқыў орынлары жанында арнаўлы курслар шөлкемлестириў лазым. Тәрбияшылар дәрежеси балалар келешеги ушын үлкен әҳмийетке ийе.

Мәмлекетимиз Президенти жаңа қурылып атырған бақшалар жойбарын таярлаўда Қубла Корея тәжирийбесин енгизиў кереклигин айтты.

- Бундай  имаратларды ескише усылдағы жойбарлар менен қурыў өзин-өзи ақламай атыр. Балалардың жатақханалары ҳәм сабақханаларын кең ҳәм жарық етип қурыўымыз керек, административлик ханаларды ықшамлаўымыз керек, - деди Президент.

Усы жерде 50, 100, 150 орынлы мектепке шекемги билимлендириў мекемелериниң үлгили жойбарлары презентациясы болып өтти. Жаңа жойбарларда мектепке шекемги билимлендириў мекемелериниң мәмлекет ҳәм мәмлекетлик емес тармақларын еле де кеңейтиў, олар ортасында саламат бәсеки орталығын қәлиплестириў, мәмлекет ҳәм жеке сектор шериклиги шәртлеринде мектепке шекемги билимлендириў мекемелериниң жаңа формаларын енгизиў сыяқлы мағлыўматлар өз сәўлесин тапты.

Президентимиз педагогика колледжин питкерген жасларды қайта таярлаў курсларына тартып, оларды мектепке шекемги билимлендириў мекемелерине жумысқа қабыллаў бойынша тапсырма берди.

 

Аўдарма: makan.uz

 

 

 

скачать dle 10.6фильмы бесплатно



  • 15-12-2017, 13:57 |
  • 689