Президент Қарақалпақстанда

Президент Қарақалпақстанда

Өзбекистан Республикасы Президенти Шавкат Мирзиёев орынларда социаллық-экономикалық реформалардың барысы, халқымыздың турмыс дәрежеси ҳәм сапасын еле де арттырыўға қаратылған абаданластырыў жумыслары менен жақыннан танысыў, халық пенен ушрасып пикирилесиў мақсетинде 20-январь күни Қарақалпақстан Республикасына келди.

Президент Шавкат Мирзиёев Хожели районы орайлық емлеўханасына келди. Заманагөй медицианлық техника менен үскенеленген бул емлеўхана райондағы 11 аўыл врачлық пункти ҳәм 4 поликлиника менен биргеликте 130 мыңнан артық халыққа сапалы хызмет көрсетип келмекте.
Президент емлеўханадағы шәраят менен танысты, қабыллаў, рентген, диагностика ҳәм бир қатар басқа бөлимлерди көрип шықты. Шыпакерлер менен сәўбетте тәжирийбели медицина кадрларын таярлаў, медициналық үскенелерден дурыс пайдаланыў, хызмет сапасын арттырыў, емлеўханалар қурыўда ҳәр бир аймақтың өзине жараса климат шараятынан келип шығыў бойынша пикир алмасты.

Буннан соң Президент «Мириўбет» ҳаяллар интернатына барып, бул жердиң жумысы менен танысты. Шыпакер ҳәм мийирбийкелер менен сәўбетлесип, бул жердеги жаратылған шәраятларды еле де жақсылаў ушын мәмлекет тәрепинен жәрдем көрсетилиўин айтты.

Райондағы 69-санлы мектеп муғаллимлери менен болған сәўбетте мектеплердиң инфрадүзилмесин жақсылаў, бул жерде лицей ҳәм колледжлердиң оқыўшыларын таярлаў ҳәм Ўатан келешеги ушын тәжирийбели кадрлар таярлаў ислерин жетилистириў темасында сөз етилди.

Президент Қарақалпақстанда

Шавкат Мирзиёев Агросанаат орайы қурылып атырған участкаға да барды. 2017-2018-жылларда иске қосылыўы режелестирилип атырған бул комплекс 11 гектар майданды ийелейди. Бул жерде аўыл хожалығы өнимлерин сақлаў, қайта ислеў, қаплаў имаратлары, сондай-ақ, терминал, жүк түсириў ҳәм тийеў майданы, музханалар, ыссыханалар, бажыхана, ангар, мийманхана, аўқатланыў орынлары, спорт комплекси сыяқлы имаратлар қурылады.
Усы жердиң өзинде Хожелиде турақ жай инфрадүзилмесин раўажландырыў мәселелери де сөйлесилди.
Мәмлекетимиз басшысы адамлар басланған өзгерислерди өз өмиринде сезиниўи ушын усы жыл жуўмағына шекем 40 көп қабатлы турақ жай имаратын қурыў ҳәм пайдаланыўға тапсырыў ҳаққында тапсырма берди.

Шавкат Мирзиёев «Қарақалпақстан» аўыллық врачлық пунктине де барды. Шыпакерлер менен сәўбет тийкарында халықтың мәмлекет мекемелерине исеними беккемлеўде медицина мекемелери хызметкерлериниң жумысы айрықша орын тутатуғынлығын айтты. Аўыллық врачлық пунктлерин медициналық үскенелер менен үскенелеў ҳәм дәри-дармақлар, басқа керекли қураллар менен тәмийинлеў мәселелери додаланды.

Президентимиз Шоманай районы Жумабай Базаров атындағы музыка ҳәм көркем-өнер мектебине барды. 211 оқыўшы билим алып атырған бул дәргайда миллий музыка әсбаплары, фортепьяно, хореография, сүўретлеў сыяқлы оннан артық бағдарда сабақлар өтиледи. Бул мектептиң ашылғанына көп болмаса да оның оқыўшылары еки мәрте мәмлекетимиз көлеминде өткерилген таңлаўда биринши орынды ийелеген. Мектеп оқыўшылары ҳәм муғаллимлери менен сөйлесиў даўамында жәмәәтшилик ўәкиллери Өзбекистан Республикасы Биринши Президенти Ислам Каримов жас әўладты физикалық ҳәм руўҳый жақтан жетик етип өсириўге айрықша итибар қаратқанын, Президентимиз Шавкат Мирзиёев ол инсанның бул бағдардағы қайырлы ислерин даўам еттирип атырғанын атап өтти.

Президентимиз Шавкат Мирзиёев «Агросервис МТП» жуўапкершилиги шекленген жәмийетиниң Қанлыкөл районы филиалында да болды. Бәҳәрги дала жумысларына пухта таярлық көриў ҳаққында пикирлести. Районда пахта майданы басқышпа-басқыш қысқартылып, шарўашылықты раўажландырыў бойынша тапсырмалар берди.

Қанлыкөл педагогика колледжинде болған сәўбетте Президентимиз колледж қәнийгелерин заман талабына сәйкес түрде өзгертиў, район экономикалық-социаллық турмысы ушын керекли кадрлар таярлаў керек екенин атап өтти. Илимий, көркем әдебиятларды қарақалпақ тилине аўдарыў, басып шығарыў ҳәм билимлендириў орынларына жеткерип бериў бойынша усыныслар берди.

Мәмлекетимиз басшысы Қоңырат – Мойнақ ишимлик суўы тармағы қурылысының басланыўы менен танысты. 101 километрли бул суў тармағы иске түскеннен кейин бир күн ишинде 7 мың куб метр суў жеткериў ҳәм 25 мыңнан артық халықты таза ишимлик суўы менен тәмийинлеў мүмкиншилиги пайда болады.

Нөкис қаласында Қарақалпақстан Республикасы белсендилери менен ушрасыў болып өтти. Жыйналыста Қарақалпақстанды социаллық-экономикалық раўажландырыў, халық ушын ылайық турмыс шәраятларын жаратыў мәселесине айрықша итибар қаратылды.

Өзбекистан Республикасы Президенти Шавкат Мирзиёевтиң Қарақалпақстандағы сапары даўам етпекте.

Мағлыўмат ҳәм фото ЎзА дан алынды.

Фото: fb.com/UzLiDeP
скачать dle 10.6фильмы бесплатно



  • 21-01-2017, 09:11 |
  • 486