Жумсалған электр энергиясына шегирме ҳәм үстеме төлеў тәртиби

Жумсалған электр энергиясына шегирме ҳәм үстеме төлеў тәртиби

Ҳәзирги күнде пүткил дүнья жүзинде жанылғы-энергетика ресурсларын тежеў ҳәм оннан үнемли пайдаланыў, кем қаржы есабына көп муғдарда сапалы өним ислеп шығарыў ең әҳмийетли мәселелерден бири саналады. Солай екен, ҳәр қандай ири қуўатлылықта өним ислеп шығарыў ҳәм оған теңлестирилген кәрханаларда жоқарыдағы келтирилген ўазыйпаларды орынлаўда, пайдаланылған электр энергиясы ушын төлемлер де мине усыннан келип шығып әмелге асырылады. Негизинде, электр энергиясы тутыныўшылары он тариф топарына бөлинеди. Сонлықтан да, тийисли тариф топарларына киретуғын реактив энергия ҳәм қуўатлылық орнын толтырыўшы электр энергиясы пайдаланыўшыларына өз алдына шегирме ҳәм үстеме тарифлер тийкарында ҳақы төлеў белгиленген.

Усы орында кимлер реактив энергия ҳәм қуўатлылық орнын толтырыўшы электр энергиясы пайдаланыўшысы екенлигин билип алыў жүдә әҳмийетли. Пайдаланыўға рухсат етилген қуўаты 50 кВт ҳәм оннан артықты қурайтуғын санаат ҳәм өндирис тутыныўшыларына яки оларға теңлестирилген тутыныўшыларға, яғный, электрлестирилген (электр энергиясы менен жүретуғын) темир жол ҳәм қала транспорты, аўыл хожалық тараўы тутыныўшылары усылар қатарына киреди.

Өзбекистан Республикасы Министрлер Кабинетиниң 2009-жыл 22-августтағы «Электр ҳәм ыссылық энергиясынан пайдаланыў қағыйдалары ҳаққында»ғы қарарының биринши қосымшасы VIII бап 131-140-бәнтлеринде қағыйдалар көрсетилип өтилген болса, Өзбекистан Республикасы Әдиллик министрлигиниң 2000-жыл 10- августта 955-сан менен дизимнен өткерилген «Электр ҳәм ыссылық энергиясы тутыныўшыларының тариф топарлары ҳаққында»ғы Режесинде реактив энергиясы ушын тарифке шегирмелер ҳәм үстемелер ушын төлемлер қай тәртипте әмелге асырылатуғыны туўралы мағлыўматлар берилген.

Әмелдеги Қағыйда ҳәм Реже талапларына муўапық I, II, III, IV тариф топарларына тийисли болған ҳәм ҳәр бир кириўде есапланған актив қуўаты 50 кВт ҳәм оннан жоқары болған тутыныўшылар бирден-бир электр энергетика системасының үлкен жүклемели саатларында (саат 07.00 ден 23.00 ге шекем) электр тәмийнаты кәрханаларының қарамағындағы электр тармақларына реактив қуўатлылық өткерип берилгенде (бирден-бир электр энергетика системасы тармағында реактив энергия пайда болғанда) реактив энергия ушын қолланылатуғын тарифтиң 15 проценти муғдарында шегирме қолланылады.

Бирден-бир электр энергетика системасының киши жүклемели саатларында (23.00 ден 07.00 ге шекем) электр тәмийнаты кәрханаларының қарамағындағы электр тармақларына реактив қуўатлылық жеткерип берилгенде (бирден-бир электр энергетика системасы тармағында реактив энергия пайда болғанда) болса реактив энергия ушын әмелге асырылатуғын тарифтиң 20 проценти муғдарында үстеме қолланылады.

Д.АЛЛИЯРОВ,
«Ўздавэнергоназорат» инспекциясы
Қарақалпақстан Республикасы
аймақлық бөлими инспекторы


Дерек: erkinkarakalpak.uz

Фото: Tafsilot.uz
скачать dle 10.6фильмы бесплатно



  • 21-04-2017, 12:44 |
  • 855