Министрлер Кеңесинде Европа тиклениў ҳәм раўажланыў банки менен семинар өткерилди

2018-жыл 19-февраль күни Қарақалпақстан Республикасы Министрлер Кеңесиниң үлкен мәжилислер залында «Европа тиклениў ҳәм раўажланыў банки (ЕТРБ) ҳәм киши ҳәмде орта бизнес субъектлери ортасындағы өз-ара шериклик механизмлери» атамасында семинар өткерилди. Бул ҳаққында Өзбекистан Саўда-санаат палатасының Қарақалпақстан Республикасы басқармасы makan.uz’ға мағлыўмат берди. Семинарды өткериўдиң тийкарғы мақсети – Республика аймағында ЕТРБ тәрепинен банклерге кредит линияларын бериў арқалы киши бизнес субъектлерин қаржыландырыў, сондай-ақ, туўрыдан-туўры қаржыландырыў бойынша режелестирилген жумыслар, қаржыландырыў тәртиплери ҳәм шәртлери ҳаққында қатнасыўшыларға мағлыўмат бериў болып есапланады.

Семинарды Өзбекистан Саўда-санаат палатасының баслығы Адҳам Икрамов, Қарақалпақстан Республикасы Министрлер Кеңесиниң баслығы Қахраман Сариев, Өзбекистан Республикасы инвестициялар бойынша мәмлекетлик комитети баслығының биринши орынбасары Лазиз Кудратовлар кирис сөз бенен ашып берди. Оннан соң ЕТРБниң Орайлық Азия ҳәм Россия бойынша басқарыўшы директоры Наталья Ханженкова шығып сөйлеп банктиң мәмлекетимизде әмелге асырыўжы режелестирген жумыслары ҳаққында айтып өтти.

Семинарда ЕТРБниң Өзбекистан Республикасындағы ўәкиллиги басшысы Алкис Дракинос «ЕТРБниң киши ҳәм орта бизнести қоллап қуўатлаў усыллары» атамасында презентация иследи. Сондай-ақ, ЕТРБниң Орайлық Азия бойынша киши ҳәм орта бизнести қаржыландырыў ҳәм  раўажландырыў департаментиниң Аймақлық директоры Назар Талибжанов, «Жеке сектор ушын мәслаҳатлар» атамасында киши ҳәм орта бизнести қаржыландырыў ҳәм  раўажландырыў департаментиниң жетекши банкири Надира Мансурова, «Жергиликли финанс мәкемелери арқалы жеке секторды қаржыландырыў» атамасында ЕТРБ ўәкиллигиниң жетекши банкири Хуршида Узаковалар презентация иследи.

Европа тиклениў ҳәм раўажланыў банкиниң Өзбекистандағы жумысы қайта тикленген болып, 2017-жылдың ноябрь айынан баслап банк тәрепинен 170 млн. АҚШ доллары муғдарында кредит линиялары ажыратылыўы бойынша келисимлер мақулланды ҳәм имзаланды. Атап айтқанда:

- 100 млн. АҚШ доллары Миллий банкке;

- 30 млн млн. АҚШ доллары Ипотека банкке;

- 30 млн. АҚШ доллары Хамкор банкке;

- 10 млн. АҚШ доллары «Uzbek Leasing International” АЖ ға.

2018-жылдың февраль айында Туризм ҳәм мәдений мийрас тараўында бирге ислесиў бойынша меморандум имзаланды. Меморандум инфраструктураны раўажландырыўға ҳәм тарийхый байлық объектлерин сақлаўға қаратылған мәдений мийрас объектлерине байланыслы жойбарларды қаржыландырыўға қаратылған.

Өзбекистан ЕТРБ тәрепинен 150 млн. евро ажыратылатуғын “Мәдений мийрас” бағдарламасында қатнасыў ушын сайланған биринши мәмлекетлерден есапланады.

2017-жылдың ноябрь айында ЕТРБ ҳәм Өзбекистан Саўда-санаат палатасы ортасында “Киши бизнес ушын мәслаҳатлар” Бағдарламасын иске түсириў бойынша 2,5 млн. евроға меморандум имзаланды.

Семинар киши бизнес ҳәм жеке исбилерменлик субъектлери ушын әмелий жақтан әҳмийетке ийе болып, семинар соңында қатнасыўшылар қәнигелерден өзлерин қызықтырған сораўларына жуўаплар алды.

 

 

 

скачать dle 10.6фильмы бесплатно



  • 19-02-2018, 16:30 |
  • 350