Медицина жаңаланыў жолында – Қарақалпақстан Республикасы Жоқарғы Кеңесиниң депутаты

Республикамызда жоқары мағлыўматлы медицина хызметкерлерине талап жоқары болып, бул өз гезегинде халыққа сапалы медициналық жәрдем көрсетиўге өз тәсирин тийгизбекте. Усындай маш­қалаларды сапластырыў мақсетинде усы жылы январь айында 131 бакалавр, 79 тар қәнигеликлер бойынша питкериўшилер мийнет шәртнамасы тийкарында шыпакерлер жетиспеген районларға жумысқа жиберилген болса, қосымша июнь-июль айларында 125 улыўма әмелият шыпакери ҳәм 4 тар қәнигеликтеги жас шыпакерлеримиз жумысқа жайластырылды.

Тараўда шыпакерлердиң кәсиплик билимин жетилис­тириўге де айрықша итибар берилип, 22 ден аслам шыпакер медицина тараўында дүньяға белгили сырт ел клиникаларында өзлериниң билимлерин асырып, симпозиумларға қатнасып қайтты. Олар бүгинги күнде сырт елдеги кәсиплеслеринен үйренген тәжирийбелерин халықтың саламатлығын қорғаў ислерине сарпламақта.

Өзбекстанда тез медициналық жәрдем көрсетиўдиң миллий модели қәлиплестирилди. Бул хызметтиң материаллық-техникалық базасын беккемлеў ушын республикалық қыстаўлы медициналық жәрдем илимий орайы Нөкис филиалы ҳәм оның районлардағы бөлимлери заман талабына сай автотранспортлар менен тәмийинленген. Атап айт­қанда, усы жылдың өткен 6 айы ишинде қыстаўлы медициналық жәрдем хызметине жаңадан 72 арнаўлы автотранспорт берилди. Республикамыз бойынша қыстаўлы медициналық жәрдем бригадалары 126 болған болса, қосымша 12 бригада иске түсирилди. Бул әлбетте, халыққа мәмлекетимиз тәрепинен кепилленген қыстаўлы медициналық жәрдем көрсетиў сапасының жақсыланғанлығынан дерек береди. Наўқасларға қыстаўлы медициналық жәрдем көрсетиў мақсетинде улыўма бригадалар 36, ал, реанимациялық бригадалар болса 41 атамадағы дәри-дәрмақлар менен толық тәмийинленген.

Халқымыз арасында социаллық жәрдемге мүтәж болған пуқараларға медико-социаллық хызмет көрсетиў сапасын жетилистириў бо­йынша да бир қатар жумыслар әмелге асырылмақта. Өткен жылға салыстырып қарайтуғын болсақ, 3 есеге көп, яғный 1,5 мыңға жақын майыплық арбашасы, протез-ортопедиялық буйымлар, еситиў үскенелери жеткерилип берилди.

Узақ ҳәм аўыллық жерде жасайтуғын халық ушын қолайлықлар жаратыў мақсетинде 145 орында социаллық дәриханалар ашылды. Олардағы дәри-дәрмақлар арзанлатылған баҳада сатылмақта. Сондай-ақ, Корея­ның мәмлекетлик емес коммерциялық емес «Friends» ҳәм «KOFIN» халықаралық шөлкеми, Ҳинд­станның Дели қаласындағы «Артемис» ҳәм Россия Федерациясының Москва қаласындағы Н.Н.Блохин атындағы Миллий медицина орайының жоқары қәнигели онколог шыпакерлери ҳәм офтальмология тараўының қәнигелери менен биргеликте хирургиялық әмелиятлар өткерилди. Бул өз гезегинде жергиликли хирург шыпакер қәнигелерге шеберлик мектеби болып, өз-ара тәжирийбелер алмасыўына имканият жаратты.

Мәмлекетимиз ғәрезсизлигиниң 27 жыллық байрамы алдынан 12-13-август күнлери Қубла Кореяның «Эвергрин Моторс» мәмлекетлик емес коммерциялық емес шөлкеминиң 32 медицина хызметкери, соның ишинде 9 шыпакер, 23 орта буўын медицина хызметкерлери денсаўлықты сақлаў министрлигиниң штаттан тыс бас қәнигелери менен бирге 2456 пуқараны медициналық тексериўлерден өткерди. Тексериў барысында олар өзлери менен бирге алып келген 73 атамадағы дәри-дәрмақлар ҳәм медициналық буйымларды наўқасларға тарқатты.

Республикамыз халқына заманагөй жоқары технологиялық медициналық жәрдем көрсетиў ушын Ташкент қаласындағы медицина орайларынан ҳәм сырт мәмлекетлердеги белгили клиникалардан 120 дан аслам тәжирийбели шыпакерлер республикамызда болып, 8 мыңнан артық халықты медициналық тексериўлерден өткерип, 79 дан артық жоқары технологиялық операциялар исленди.

Денсаўлықты сақлаў тараўында бирден-бир мәмлекетлик сиясатты әмелге асырыў мақсетинде халқымызға көрсетилип атырған медициналық жәрдемниң сапасын еле де жақсылаў ушын Ташкент қаласындағы қәниге­лес­тирилген медициналық орайлардан 2 медицина илимлериниң докторы, 5 медицина илимлериниң кандидаты, 2 жоқары дәрежели шыпакер бизиң республикамызға басшы сыпатында келип, өз жумысларын алып бармақта.

Денсаўлықты сақлаў тараўын түпкиликли жаңалаў бойынша әмелге асырылып атырған кең көлемли жумыслар ҳәм олардың нәтийжелери ҳаққында көп сөз етиў мүмкин. Қәрезсизлигимиздиң ҳәр бир жылы денсаўлықты сақлаў тараўының жаңа басқышқа көтерилиўинде, тараўдың материаллық-техникалық базасының еле де беккемленип, хызмет көрсетиў сапасының жақсыланыўында әҳмийетли қәдем болатуғынлығы сөзсиз.

Алдымыздағы ўазыйпа — медициналық хызметти жаңа сапаға көтериў, оны халыққа жақынлатыў, усы хызметтен пайдаланыўды әпиўайыластырыў ҳәм жетилистириў болып табылады.

 

А.МАТКАРИМОВА,

Қарақалпақстан Республикасы Жоқарғы Кеңесиниң депутаты.

Медицина илимлериниң кандидаты, доцент.

 

Дерек: «Еркин Қарақалпақстан» газетасы

скачать dle 10.6фильмы бесплатно



  • 25-09-2018, 09:31 |
  • 323