Полиомелит — жуқпалы кеселлик

Инсан өмириндеги өткир жуқпалы кеселликлердиң бири полиомелит болып, оны келтирип шығаратуғын полиовируслар адамның нерв системасын зыянлайды. Бул кеселликтиң өз ўақтында алды алынбай, асқынып кетсе адамды ләңликке, ҳәтте набыт болыўға да алып келеди.

Полиомелитти жуқтырғанлар арасында кеселлик белгилери жеңил кешеди, бирақ, инфекция жуқтырған ҳәр 200 баланың биреўинде ләңлик гүзетиледи.

Бул кеселликтиң белгилери ҳаққында айтатуғын болсақ, наў­қаста дене ыссылығы көтериледи, басы аўырады, ҳәлсизлик, қусыў, булшық етлердиң тырысыўы бақланады, жоқары ҳәм төменги ҳәрекетлениў бөлиминде ләңлик гүзетиледи.

Бул кеселликтиң тек вакцинация менен алдын алыў мүмкин. Бүгинги күнде дүнья мәмлекетлеринде орал полиомелит вакцина (ОПВ) қолланады. Бул вакцина, сондай-ақ, ИПВ (инактивленген полиомелит вакцина) вакциналары балаларды полиовирус келтирип шығаратуғын ләңликтен сақлайды. ОПВ ишектиң силекей қабатында иммунитет пайда етеди, вирустың адамнан адамға өтиўиниң алдын алады. ИПВ менен ОПВ вакциналарының бирге қолланылыўы ишек иммунитетин беккемлейди. Режели иммунизация шеңберинде ОПВның бир неше дозасын алған балалар қосымша бир доза ИПВ менен шаншылыўы керек.

Егер биз жоқарыда айтыл­ған қағыйдаларға әмел етип, шыпакерлердиң кеңеслерине қулақ тутсақ, балаларымызды ҳәм өзлеримизди полиомелиттен сақлаған боламыз.

 

И.АМЕТОВА,

Нөкис қаласы, 8-санлы шаңарақ поликлиникасының шыпакери.

 

Дерек: «Еркин Қарақалпақстан» газетасы

скачать dle 10.6фильмы бесплатно



  • 8-05-2018, 14:20 |
  • 224