Усы жылы ЖОО ларына қабыллаў бойынша қандай өзгерислер бар? Толық жуўап алың

Усы жылы ЖОО ларына қабыллаў бойынша қандай өзгерислер бар? Толық жуўап алың

2017-жылдағы қабыллаў комиссиялары жумыс баслайтуғын ўақыт жақынласпақта. 2017-жыл 5-май күни Президент қарары менен қабыллаў квоталары тастыйықланғаны усы жылғы қабыллаў мәўсимин рәсмий түрде ашып берди. Усы қарар тийкарында бир неше жаңалықлар ҳәм өзгерислер гүзетилмекте. Xushnudbek.uz сайтында бул жаңалықлар ҳаққында кысқаша мағлыўмат берилген.

1. Квоталар 8 мың 409 ға көбейген ҳәм жәми 66 мың 316 студент қабылланады;

2. Наўайы мәмлекетлик кәншилик институты ҳәм Ташкент темир жол инженерлери институтында арнаўлы сыртқы бөлим ашылды. Өз нәўбетинде Ташкент химия-технология институтының (Қоңырат бөлими) арнаўлы сыртқы бөлими жабылды;

3. Усы жылдан тест сынақларынан табыслы өте алмаған абитуриентлер төлемли-контракт пулының асырылған ставкасы есесине студентликке қабылланыўы мүмкин. Тек ғана буның ушын абитуриент кеминде 68 балл топлаған болыўы керек. Қосымша қабыллаў бойынша төлемли-контракт пулының асырылған ставкасы абитуриентлер топлаған балларға қарап Мәмлекетлик комиссиясы тәрепинен дифференцияласқан тәртипте белгиленеди. Ҳәзирше контракттың баҳасы белгили емес. Сондай-ақ, қосымша контракт орны да шекленген болады, 68 баллдан көп топлаған барлық абитуриентлер де қабыллана бермейди;

4. Медицина жоқары оқыў орынлары енди мәмлекет гранты тийкарында аймақларға бөлистирилген квота менен студент қабыллайтуғын болды. (Усы мәнзил арқалы Ташкент педиатрия медицина институты Нөкис филиалына мақсетли қабыллаў квоталары ҳаққында мағлыўмат алсаңыз болады)

5. Ташкент медицина академиясының Ферғана филиалы ҳәм Ташкент химия-технология институтының Қоңырат бөлими усы жылдан баслап жабылды. Олар енди студент қабылламайды;

6. Ташкент мәмлекетлик стомотология институтының аймақлардағы барлық филиаллары, атап айтқанда Андижан, Бухара, Самарқанд ҳам Нөкис филиаллары жабылды. Буның орнына алдындағыдай аймақлардағы медицина институтларында «Стомотология» факультетлери қайтадан шөлкемлестириледи;

7. Ташкент медицина академиясының Үргениш филиалына және студентлер қабыллаў басланды. Өткен жылы бул филиал ушын квота ажыратылмаған еди;

8. Термиз қаласында Ташкент мәмлекетлик техника университети ҳәм Ташкент мәмлекетлик аграр университетиниң филиаллары ашылды. Енди усы еки университетте оқыўды қәлеўши абитуриентлер Термиз қаласындаға филиалында да оқыса болады;

9. Наманган инженерлик-педагогика институтының аты Наманган инженерлик-қурылыс институты деп өзгертилди.

Еслетиў. 2016-жылдың 16-июнь күни Өзбекистан Республикасы Министрлер кабинетиниң «Жоқары оқыў орынларына кириў тест сынақларына таярлық көриў процесси оптималластырылыўы мүнасибети менен Өзбекистан Республикасы Ҳүкиметиниң айырым қарарларына өзгерислер киритиў ҳаққында»ғы қарары қабылланған еди.

Усыған муўапық, усы жылдан баслап ЖООларға ҳүжжетлер 15-июннан 15-июльға шекем қабылланады. Мәмлекетлик консерваториясында болса қабыллаў комиссиясы 15-июннан 10-июльға шекем ҳүжжетлерди қабыллайды.

Сондай-ақ, киритилген өзгерислерге муўапық, Жоқары әскерий жоқары окыў орынларына кириў ушын тест сынақлары 5-июльға шекем өткериледи.

Буған дейин тест сынақлары 10 июль сәнесине шекем өткерилетуғын еди.

Фото: Norma.uz



Темаға байланыслы:
«Жоқары билимлендириў системасын буннан былай да раўажландырыў илажлары ҳаққында» Президент Қарары

Қарақалпақстандағы ЖООларына бакалавр қабыллаў квотасы

ЖОО жаңа оқыў жылында неше бюджет, неше контракт орын ажыратылды?

ҚМУ магистратура бөлиминде биринши рет философия қәнийгелиги ашылады

2017-2021-оқыў жыллары ҚМУ да жаңадан ашылатуғын қәнийгеликлер дизими менен танысыңскачать dle 10.6фильмы бесплатно



  • 10-05-2017, 09:47 |
  • 744