Абитуриентлер ушын: Ҳүкимет қарары тастыйықланды

Өзбекстан Республикасы Министрлер Кабинетиниң 2019-жыл 7-июнь күнги “Жоқары оқыў орынларына оқыўға кириў ушын ҳужжетлерди қабыл етиў бойынша мәмлекетлик хызметлерин көрсетиўдиң ҳәкимшилик регламентин тастыйықлаў ҳаққында” ғы  468-санлы қарарына тийкар, абитуриентлер Мәмлекетлик хызметлер орайлары яки Өзбекстан Республикасы бирден-бир интерактив мәмлекет хызметлери порталы (интернет тармағы) арқалы республика мәмлекетлик  жоқары оқыў орынлары бакалавриатына оқыўға кириў ушын ҳүжжетлер тапсырыўы белгиленген.

Абитуриентлер өзлериниң турақлы (ўақтыншалық) дизимге алынған жерине қарамастан, қәлеген Мәмлекетлик хызметлер орайына хызметтен пайдаланыў ушын мүрәжаат етиўи мүмкин.

Шет ел, жеке меншик ҳәмде әскерий жоқары оқыў орынларына, жоқары оқыў орынларының магистратурасына, тест сынаўлары өткерилместен дөретиўшилик имтиханлар арқалы оқыўға қабыл қылынатуғын  жоқары оқыў орынлары бакалавриат тәлим бағдарларына оқыўға кириў ушын, жоқары оқыў орынларына шет ел пуқаралары тәрепинен ҳүжжет тапсырыўға ҳәмде Өзбекстан Республикасы билимлендириў мәкемелерине оқыўға қабыл қылыў бойынша мәмлекетлик комиссиясы тәрепинен Орайлар яки интернет тармағы арқалы кириў тест сынаўларында қатнасыў ушын дизимнен өтиў белгиленбеген мәмлекетлик жоқары оқыў орынларына ҳүжжетлер қабыл етилмейди.

Абитуриентлерге мәмлекетлик хызметлер ҳәр жылы 15-июннан, 15-июлға шекем көрсетиледи.

         Абитуриентлерден төмендеги ҳужжетлердиң түп нусқалары талап етиледи:

-        Пуқаралық паспорты (Ишки ислер бөлимлери тәрепинен берилген 09-форма бойынша физикалық шахстың идентификация номери, паспорт сериясы ҳәм номери көрсетилген мағлыўматнама);

-        паспорт жасына жетпегенлер ушын туўылғанлық ҳаққындағы гүўалық;

-        улыўма орта билимлендириў (11-класс тийкарында) яки орта арнаўлы, кәсип-өнер билимлендириў орынларын питкергенлиги ҳаққында ҳүжжет (қосымшасы менен бирге)№

-        Өзбекстан Республикасы Президентиниң ҳәмде Министрлер Кабинетиниң норматив-ҳуқықый ҳүжжетлеринде белгиленген тәртипте жеңилликке ийе болған абитуриентлер жеңиллик ҳуқықын тастыйықлаўшы ҳүжжет;

         Абитуриентлер бир ўақыттың өзинде, оқытыўдың бир формасы шеңберинде үшеўге шекем жоқары оқыў орынларын таңлаў мүмкин. Бир нешше жоқары оқыў орынларын танлаўда имтихан тапсырылатуғын пәнлер топламы ҳәм избе-излиги сәйкес болыўы шәрт.

         Әмелдеги оқыў жылы питкериўшилери ҳәмде нәгиранлығы болған яки толық мәмлекет қарамағындағы шахслардан мәмлекетлик хызметлер көрсетилгенлиги ушын төлем төленбейди.

         Әмелдеги оқыў жылынан алдынғы жылларда билимлендириў орынларын питкерген абитуриентлерден ең кем айлық ис ҳақының 50 пайызы муғдарында төлем өндириледи.

         Төлемлер Орайларда жайласқан банк кассалары ҳәм Орай хызметкерлери тәрепинен нақ ҳәм нақ емес пул көринисинде қабыл қылынады.

         Имтияз түрлери төмендегилерден ибәрат:

-        Өзбекстан Республикасы Қураллы күшлери әскерий хызметкерлериниң балалары;

-        Халықаралық ҳәм республика олимпиадалары, таңлаўлар жеңимпазлары болған академиялық лицейлер, кәсип-өнер коллежлери ҳәм улыўма билимлендириў мектеплериниң питкериўшилери;

-        “Зульфия” атындағы Мәмлекетлик сыйлығы лауреатлары;

-        “Мард уғлон” Мәмлекетлик сыйлығы ийелери;

-        “Жылдың ең жақсы тәрбияшысы” республика таңлаўы жеңимпазлары;

-        Медицина бирлеспелери мийирбийкелериниң “Мийирбийке” республикалық таңлаўы жеңимпазлары;

-        Көркем-өнер академиясының сүўретлеў өнери бойынша республика таңлаўы жеңимпазлары;

-        “Ниҳол” сыйлығы ийелери;

-        Өзбекстан жаслар аўқамының республика комиссиясы тәрепинен берилген усыныснама ийелери (педагогика тәлим бағдарларына);

-        Толық мәмлекет қарамағындағы балалар;

-        Өзбекстан Республикасы Қураллы күшлери қатарында мүддетли әскерий хызметты атқарып, әскерий бөлим командириниң усыныснамасына ийе болған пуқаралар;

-        Шет тилин билиў дәрежеси ҳаққында Мәмлекетлик үлгидеги В1 ҳәм оннан жоқары дәрежедеги тәжирийбе сертификатына ийе болған абитуриентлер;

-        Әскерий бөлим командири ҳәм Жаслар аўқамы басланғыш шөлкеминиң усыныснамасына ийе болған пуқаралар.

        

 

Абитуриентлер ушын, Кегейли районы Мәмлекетлик хызметлер орайы Кегейли районы, Дослық гүзәри көшеси номерсиз үй де жайласқан, бағдар Дослық майданы. Мағлыўмат ушын телефон: +61 412-33-47.

Электрон почта: kegeyliodnookno@umail.uz

 

Ж.Тулегенова

Кегейли районы Мәмлекетлик хызметлер

орайы бас қәнигеси

скачать dle 10.6фильмы бесплатно



  • 10-06-2019, 19:21 |
  • 1 226