«Соңғы қоңыраў» барлық мектеплерде саат 08:00 де басланып 09:00 де жуўмақланады. Басқа да қатаң талаплар белгиленди

Халық билимлендириў министрлиги улыўма орта билим бериў мектеплеринде 2018-2019-оқыў жылын жуўмақлаў ҳәм «Соңғы қоңыраў» илажларын өткериў бойынша усыныслар берди.
Елимиздеги барлық улыўма орта билим бериў мәкемелеринде 2018-2019-оқыў жылын жуўмақлаў ҳәм «Соңғы қоңыраў» илажларын жоқары дәрежеде өткериўди шөлкемлестириў мақсетинде төмендегилерге әмел етиў усыныс етиледи:
- улыўма орта билим бериў мәкемелеринде «Соңғы қоңыраў» илажларын усы жылдың 25-май күни азанғы саат 08:00 де «Мениң мектебим – мениң үйим» ураны астында шөлкемлестириў;
- илажды тек ғана 1- ҳәм 11-класслар қатнасыўында 1 саат даўамында өткериў (9-класс оқыўшылары питкериўши есапланбайды);
- «Соңғы қоңыраў» илажларының мектеп ҳәўлиси, бағында ямаса саялы-салқын ашық майданшаларында өткериў және мектеп аймағына техникалық қураллар ҳәм басқа адамлардың киргизилмеўин тәмийинлеў;
- питкериўши оқыўшылардың мектеп формасынан басқа ҳәр қыйлы липаслар ҳәм ленталар тағып алыўының алдын алыў;
- илажлар өткерилетуғын орынларды талап дәрежесинде үскенелеў, гигиена ҳәм тазалық талапларына муўапық шараятлар жаратыў, өрт ҳәм техникалық қәўипсизлик қағыйдаларына әмел ете отырып, оқыўшылардың қәўипсизлигин тәмийинлеў;
- улыўма орта билим бериў мәкемелеринде илажлардың тәртипли өтиўин тәмийинлеў мақсетинде орынлардағы мәкан пуқаралар жыйыны, ата-аналар ҳәм ҳуқық қорғаў уйымлары ўәкиллери менен бирге ислесиў;
- мектеп басшылығы тәрепинен илаж қатнасыўшыларын қутлықлаў процесинде елимизде соңғы жыллары ерисилген табыслар, әмелге асырылған кең көлемли дөретиўшилик жумыслары, билимлендириў системасындағы реформалар ҳаққында анық санлар ҳәм дәлиллер келтирилген ҳалда мағлыўмат бериў;
- илажға ветеран муғаллимлер, ата-аналар, кәсиплик аўқамы, мәкан пуқаралар жыйыны ҳәм бирге ислесиўши шөлкемлер, сондай-ақ, үлги болатуғын мектептиң бурынғы питкериўшилерин мирәт етип, олар тәрепинен питкериўшилерге байрам қутлықлаўы ҳәм тилеклерин билидириўин шөлкемлестириў;
- илажда жыл даўамында үлгили минез-қулқ ҳәм баҳаларға оқып, ең жоқары рейтинглик көрсеткишлерге ерискен қәбилетли питкериўшилерди сыйлықлаў ҳәм хошаметлеў;
- «Соңғы қоңыраў» илажларын, басқышлы қадағалаў имтиханлары ҳәм жуўмақлаўшы мәмлекетлик аттестацияларды өткериўде, билимлендириў мәкемелерин жаңа оқыў жылына таярлаў бойынша оқыўшы ҳәм питкериўшилер және олардың ата-аналарынан ҳәр қыйлы пул қаржыларын жыйнаў қатаң түрде қадаған етиледи;
- улыўма орта билим бериў мәкемелери басшылары және муғаллимлерине питкериўшилер тәрепинен ҳәр қыйлы қымбат баҳалы саўғалар бериў, қосымша ҳәр қыйлы салтанатлы илажларды (үйлер, ресторан ямаса кафелер ҳәм т.б. да банкет ямаса басқа илажлар) өткериў ҳәм жеңил автомашиналарда сейилге шығыўға жол қойылмайды;
- илажды шөлкемлестириўде мектептиң «Бақлаў кеңеси» ағзалары белсене қатнасыўы менен бирге жоқарыда келтирип өтилген усынысларға әмел етилиўи бойынша қадағалаў алып барады.

Билимлендириў мәкемелеринде өткерилетуғын «Соңғы қоңыраў» байрам илажы сценариясын дүзиўде төмендегилерге итибар қаратыў керек:
«Соңғы қоңыраў» илажы билимлендириў мәкемесиниң баслығы басшылығында, директордың руўхыйлық-ағартыўшылық жумыслары бойынша орынбасары, муғаллимлер, жаслар жетекшилери тәрепинен жобаластырылады.
Илаждың мазмуны ҳәм әҳмийетинен келип шығып (сценария), дөретиўшилик тәрептен басшылыққа алып, излениўшилик ҳәм белсендилик пенен оны жоқары дәрежеде өткериў, дәрежесин арттырыў илажлары көриледи.
25-май «Соңғы қоңыраў» илажы республикадағы барлық мектеплерде саат 08:00 де басланып 09:00 де жуўмақланады.
Илажды шөлкемлестириўде Халық билимлендириў министрлигиниң усыныс ҳәм көрсетпелерине тийкарланыў, мирәт етилген мийманлар, ата-аналар ушын қолайлы орын сайлаў, санитария ҳәм гигиена, өрт ҳәм техникалық қәўипсизлик қағыйдаларына әмел етиў зәрүр.

Ислам Матеков.

http://karinform.uz

скачать dle 10.6фильмы бесплатно



  • 21-05-2019, 16:48 |
  • 1 055