Хушнудбек Худайбердиев абитуриентлер ушын мағлыўмат жәриялады

Бир ўақыттың өзинде 3 жоқары оқыў орнына ҳүжжет тапсырыў тәртиби қандай болады?

Ҳуқықтаныўшы ҳәм блогер Хушнудбек Худайбердиев өз каналында «Өзбекстан» телеканалының «Муносабат» ток-шоусында Мәмлекетлик тест орайы ўәкили 3 тәлим бағдарын сайлаў тәртиби қандай болатуғынлығы ҳаққында анықлық киргизгени бойынша мағлыўмат берди.

Хабарда жазылыўынша, абитуриент 1-бағдарға контракт, 2-бағдарға грант, 3-жөнелиске контракт тийкарында оқыўға кирген болса, бундай жағдайда грант тийкарында оқыўға кирген 2-бағдарды таңлаў мүмкин бе? деген сораўға төмендегише жуўап берилген:

Абитуриентлер ҳүжжет тапсырып атырған ўақытта, 3 бағдарда баслы избе-изликте белгилейди. Яғный биринши, екинши ҳәм үшинши бағдар сыпатында қайсы жоқары оқыў орынларын сайлағанын алдын ала белгилейди.

Бундай жағдайда абитуриент баслы бағдарға кире алмаған жағдайда ғана кейинги бағдарда әўметин сынап көриўи мүмкин. Егер 1-бағдарға контракт, 2-бағдарға контракт (ямаса грант), 3-бағдарға грант (ямаса контракт) тийкарында оқыўға кирген болса, онда кейинги бағдарлар ушын таңлаўда қатнаса алмайды.

Анықлаў етип айтқанда, бундай жағдайда абитуриент 1-бағдарда контракт тийкарында оқыйды. Егер ол 1-бағдардан жетерли балл топлай алмаса екинши бағдарды, егер 2-бағдардан да жетерли балл топлай алмаса 3-бағдарды таңлаўы мүмкин.

 

Дөретиўшилик имтиханы болған абитуриентлер 3 жоқары оқыў орнына ҳүжжет тапсыра ала ма?

 

Ҳуқықтаныўшы ҳәм блогер Хушнудбек Худайбердиев өз каналында «Өзбекстан» телеканалының «Муносабат» ток-шоусында Мәмлекетлик тест орайы ўәкили кәсиплик (дөретиўшилик) имтихан тапсыратуғын абитуриентлер 3 тәлим бағдарын сайлай алмайтуғынлығы ҳаққында атап өткенин жазды.

Хабарда келтирилиўинше, 3 тәлим бағдарын сайлаў ҳуқықы тек ғана тест сынақларын тапсыратуғын жоқары оқыў орынлары ушын әмел етеди.

Ҳәзирше кәсиплик (дөретиўшилик) имтиханлар өткерилетуғын бағдарлар ушын бундай имканият жоқ.

Бул категорияға тек ғана кәсиплик (дөретиўшилик) имтихан арқалы, ямаса ҳәм кәсиплик (дөретиўшилик) имтихан, ҳәм тест сынақлары арқалы оқыўға қабылланатуғын бағдарлар киреди.

Мәмлекетлик хызметлер орайы арқалы жоқары оқыў орынларына ҳүжжет қабыллаў тәртиби қандай болады?

Ҳуқықтаныўшы ҳәм блогер Хушнудбек Худайбердиев өз каналында «Өзбекстан» телеканалының «Муносабат» ток-шоусында Мәмлекетлик хызметлер агентлиги бөлим баслығы Улуғбек Маҳмудов қабыллаў процесине байланыслы төмендеги мағлыўматларды билдирип өткени ҳаққында жазды:

– қабыллаў процеси ўақтында мәмлекетлик хызметлер орайлары 3 сменада, дем алысларсыз, күни-түни 24 саат жумыс ислейди ҳәм абитуриентлерден ҳүжжетлерди қабыл етеди;

– мәмлекетлик хызметлер орайларында төмендегилер ушын ҳүжжетлер қабыл етилмейди: магистратура, сыртқы бөлим, жеке меншик жоқары оқыў орынлары және әскерий билимлендириў мәкемелери. Басқа жоқары оқыў орынларына ҳүжжетлер қабыл етиледи;

– ҳүжжет тапсырыў ушын тек ғана паспорт және диплом (аттестат) болыўы керек. Быйылғы жылдан баслап медициналық мағлыўматнама (086-форма) және 3х4 см өлшемдеги фотосүўретти тапсырыў шәрт емес;

– быйылғы жылдан баслап абитуриентлер паспорты ҳәм дипломының түп нусқасын көрсетеди, дизимге алып болғаннан соң, ҳүжжетлерин өзи менен бирге алып кетеди. Алдынғы жылларға уқсап ҳүжжетлериниң түп нусқасын қалдырып, оқыўға кире алмағаннан соң, архивлерден ҳүжжетин қайтып алыў ушын әўере болмайды;

– ҳүжжетлерди қабыллаў 2 басқышта әмелге асырылады:

1-басқыш: алдынғы жылларда «оқыўдан жығылған» абитуриентлердиң ҳүжжетлери 1-майдан 20-июньға шекем қабыл етиледи;

2-басқыш: тест жылында оқыўды питкерген питкериўшилерден болса 21-июньнан 10-июльға шекем ҳүжжетлер қабыл етиледи;

– нәўбетте турыўды қәлемеген абитуриентлер ҳүжжетлерин онлайн тәризде Бирден-бир мәмлекетлик хызметлер порталы арқалы да ҳүжжет тапсырыўы мүмкин болады. Тек ғана төмендеги категорияға киретуғын абитуриентлер онлайн тәризде ҳүжжет тапсыра алмайды:

–  айырықша жеңилликке ийе болған абитуриентлер (яғный ҳәр қыйлы сыйлық ийелери, олимпиада жеңимпазлары ҳәм т.б.);

– пуқаралық паспорты болмаған адамлар (мәселен, 16 жасқа толмағанлар);

– пуқаралығы болмаған адамлар.

– мәмлекетлик хызметлер орайы арқалы ҳүжжет қабыллаў қәрежетлерин қаплаў ушын абитуриентлерден ең кем мийнет ҳақының 10% и муғдарында төлем өндириледи (ҳәзирги ўақытта бул 20 мың 273 сумды қурайды). Бул төлем ҳәммеден алынады ҳәм бул төлемди алдынғы оқыў жылында питкергенлерден алыў усыныс етилип атырған ең кем мийнет ҳақының 1 есеси муғдарындағы төлем менен алжастырып алмаў керек.

 

Ислам Матеков,

Қарақалпақстан хабар агентлигиниң шолыўшысы.

 

скачать dle 10.6фильмы бесплатно



  • 14-03-2019, 10:48 |
  • 663