НМПИда журналистика бойынша докторантура ашылды

Әжинияз атындағы Нөкис мәмлекетлик педагогика институты 2019-жыл ушын Журналистика қәнигелиги бойынша таяныш докторантура (PhD)ға оқыға қабыл етиўди дағазалады. Бул ҳаққында институт басшылығы хабар берди.

- Институтымызда алдын 4 қәнигелик бойынша таяныш докторантлары таярланатуғын болса, енди 10 қәнигелик бойынша талабанлар докторантура (PhD)ға қабылланады, - дейди интституттың илимий ислер ҳәм инновациялар бойынша проректоры Муятдин Жалелов. – Институтымыздағы илимий талаптан келип шығып, Қарақалпақстанда биринши мәрте Журналистика қәнигелиги бойынша докторантлар таярланатуғын болды.

Институтта алдын ярым өткизгишлер физикасы (01.04.10), Өзбекстан тарийхы (07.00.01), Қарақалпақ тили. Қарақалпақ әдебияты (10.00.03), Жас ҳәм педагогикалық психология. Раўажланыў психологиясы (19.00.06) қәнигеликлери бойынша илимий дәрежели педагог кадрлар таярланған болса, 2019-жылдан Журналистика (10.00.09), Қарақалпақ әдебияты (10.00.12), Экономикалық ҳәм социаллық география (10.00.02), Педагогика теориясы. Педагогикалық тәлийматлар тарийхы (13.00.01), Тәлим-тәрбия теориясы ҳәм методикасы (тараўлар бойынша. 13.00.02), Дене тәрбия ҳәм спорт шынығыўлары теориясы ҳәм методикасы (13.00.04), Социаллық психология. Этнопсихология (19.00.05) тараўларында докторантлар таярланады.

Жаңа қабыл квотасында Қарақалпақ тили бойынша докторантураға қабыллаў белгиленбеген.

Ҳүжжетлер усы жыл 15-сентябрь – 16-октябрь аралығында қабылланады.

Еслетип өтемиз, Қарақалпақстанда Журналистика бойынша бакалавр ҳәм магистр қәнигелер тек Қарақалпақ мәмлекетлик университетинде таярланады. Усы оқыў жылынан баслап, университетте Журналистика бойынша қабыллаў квоталар саны көбейди және сыртқы бөлим ашылды. Студентлер өзбек ҳәм қарақалпақ топарларында билим ала баслады.

 

Е.Қанаатов

Дерек: ustaz.uz

скачать dle 10.6фильмы бесплатно



  • 24-09-2018, 21:31 |
  • 104