Нөкис районда 150 волонтёр таярланбақта

Халықтың медициналық мәдениятын көтериў арқалы ықлымның өзгериўи ҳәм экологиялық жағдайдың төменлеўи менен байланыслы болған дем алыў жоллары, жүрек қан тамыр, асқазан ишек кеселликлериниң алдын алыў мақсетинде БМШтың 4 агентлик (БМШтың Раўажландырыў басқармасы, ЮНЕСКО, ЮНФПА ҳәм БМШтың Ықтыярлылыр басқармасы) менен биргеликте Республикамыздың 10 районында ықтыярлыларды таярлаў жойбары әмелге асырылмақта.

Бул «Арал бойы регионы ушын инсан қәўипсизлиги бойынша көпшериклик фондын шөлкемлестириў арқалы Арал теңизи апатшылығынан жәбир көрген халықтың турмыс шараяты мүмкиншиликлерин беккемлеў» атамасындағы жойбардың ўазыйпасы қарақалпақстан Республикасы Денсаўлықты сақлаў министрлиги менен биргеликте семинарлар өтиў арқалы халық арасынан ықтыярлыларды (волонтерлар) таярлаў арқалы аймақ турғынлары арасында кеселликлердиң алдын алыў бойынша үгит-нәсият жумысларан алып барыў. Сол тийкарда Нөкис районында да 150 ықтыярлыларды таярлаў мақсетинде дәслепки 2 күнлик тренинг «Қырантаў» АПЖсында болып өтти, деп хабар бермекте район ҳәкимлиги. Бул тренингге «Қырантаў», «Кердер» ҳәм «Ақтерек» пуқаралар жыйынларынан 30 ықтыярлылар қатнасты. Тренингти тәжирийбели шыпакерлер интерактив түрде, керекли көрсетпели қураллар тийкарында алып барды.

Тренинг даўамында пуқаралардың медициналық мәдениятын арттырыў, әсиресе, экологиялық жағдайдың төменлеўи менен байланыслы болған дем алыў жоллары, жүрек қан тамыр, асқазан ишек кеселликлериниң алдын алыўда ықтыярлылардың ўазыйпаларынан күтилетуғын нәтийжелер баслы дыққат қаратылды. Халық арасында бул бағдарда үгит-нәсият алып барыў арқалы 3 пуқаралар жыйыны аймағындағы 3400 ден зыят шаңарақларды қамтып алыў нәзерде тутылған.

«Ҳәр қандай кеселликти емлегенен көре алдын алған жақсы» принципи тийкарында алып барылып атырған бул ийгиликли жумыслардың нәтийжелери ықтыярлылардың тренинг даўамында алған билим ҳәм көнликпелерин әмелиятта қолланыў арқалы жүзеге шығады. Сол тийкарда халық саламатлығы беккемленип, Арал апатшылығынан жәбирленген халықтың турмыс шараятлары жумсартылады.

скачать dle 10.6фильмы бесплатно



  • 5-07-2018, 14:22 |
  • 340