Салық билимлери-балаларға таңлаўының Өзбекстан Республикасы  басқышы болып өтти

Ташкент салық колледжинде Өзбекстан Республикасы Мәмлекетлик салық комитети тәрепинен ҳәр жылы турақлы түрде өткерилип киятырған “Салық билимлери-балаларға” таңлаўының 2018-жылдағы жуўмақлаўшы Өзбекстан Республакасы басқышы болып өтти.

Таңлаўды өткериўден мақсет өсип киятырған өқыўшы жаслар арасында жоқары салық мәдениятын қәлиплестириў, салық сиясаты ҳаққындағы билимлерин анықлаў, олардың усы бағдардағы түсиниклерин еледе тереңирек  жетилистириўден ибарат болып есапланады. Бул таңлаў Өзбекстан Республикасы мәмлекетлик салық комитети ҳәм Халық билимлендириў министрлиги, Орта арнаўлы кәсиплик билимлендириў Орайы, Өзбекстан Жаслар аўқамы менен биргеликте ҳәр жылы турақлы турде 3 басқышта өткерилип келинеди.

Еслетип өтемиз, усы жылдың 25-апрель күни таңлаўдың Қарақалпақстан Республикасы басқышында республикамыздың барлық қала ҳәм районларынан салық ҳаққындағы ийелеген билим ҳәм көнликпелерин  сынап көриў мақсетинде 350 оқыўшы қатнасты. Олардың  арасынан 32 оқыўшы жеңимпаз деп табылған еди. Таңлаўда улыўма билим бериў мектеплериниң  1-4-классларында оқып атырған оқыўшылар “Салық системасының  сүўретлердеги көриниси”, 5-9 класс оқыўшылары “Салық системасының гүрриңлерде сүўретлениўи”, академиялық лицей ҳәм кәсип-өнер колледжлери оқыўшылары болса “Өзбекстан Республикасында салық сиясаты” атамасындағы ең жақсы шығарма ҳәмде “Салықлар нелерге төленеди ҳәм нелерге жумсалады?” темасындағы компьютер презентациясы номинациялары бойынша өз-ара беллести.

Төрешилер қурамы ҳәр бир қатнасыўшының салық системасы ҳәм мәденияты, салықлардың нелерге жумсалыўы ҳәм қалай бөлистириўлери, салық тараўына байланыслы болған билимлерин қатаң турде баҳалап барды.

Таңлаўдың Қарақалпақстан Республикасы басқышында Нөкис қаласы 33-санлы сүўретлеў өнерин үйретиўге қәнигелестирилген улыўма билим бериў мектебиниң 4-класс оқыўшысы Сулайман Сәрсенбаев, 27-санлы мектептиң 9-класс оқыўшысы Диана Шарапатдинова, Нөкис экономика колледжи 3-басқыш оқыўшысы Нилуфар Базарбаева, Қараөзек экономика ҳәм турмыс хызмети кәсип-өнер колледжиниң 3-басқыш оқыўшысы Улзада Балтабаевалар жеңимпаз деп табылып Өзбекстан Республикасы басқышына жоламма алған еди. 

Таңлаўдың Өзбекстан Республикасы басқышы 23-май күни Ташкент Салық колледжинде болип өтти. Онда 5-9-класс оқыўшылары арасында “Салық системасының гүрриңлерде сүўретлениўи” номинациясы бойынша Нөкис қаласындағы 27-санлы улыўма билим бериў мектебиниң 9-класс оқыўшысы Диана Шарападинова сыйлы 2-орынға ылайық деп табылды.

Салық билимлери-балаларға таңлаўының Өзбекстан Республикасы  басқышы болып өтти

 

Барлық қатнасыўшыларды хошаметлеў ушын Ташкент қаласындағы “Ашхобод” дем алыў бағында ҳәр жылғыдан өзгеше Өзбекстан республикасының эстрада жулдызлары

қатнасыўында концерт-тамаша жыйналғанлардың нәзерине усынылды. Бул концерт балалар ушын ҳақықый байрамға уласып кетти ҳәм кеўил олардың кейпиятларын жоқары дәрежеге көтерди.

 Таңлаў жуўмағында жеңимпазлар таңлаў шөлкемлестириўшилери тәрепинен  арнаўлы диплом ҳәм қымбат баҳалы саўғалар менен сыйлықланды.   

 

Дилбархан Айымбетова

 Қарақалпақстан Республикасы

Мәмлекетлик салық басқармасы бас инспекторы

скачать dle 10.6фильмы бесплатно



  • 25-05-2018, 10:00 |
  • 148