Мектеплерде «ремонт»қа оқыўшылардан ақша жыйнаў нызамсыз ҳәм бундай жағдайлар нызамға муўапық қуўдаланады

Kun.uz Телеграм каналында Қарақалпақстан Республикасы пайтахты Нөкис қаласында жасаўшы ата-аналардан бириниң төмендеги мазмунда мүрәжати жәрияланған еди:

«Еки қызым ҳәм бир улым қаладағы 12-мектепте оқыйды. Мектептиң ремонтына мәмлекет пул ажырата ма, жоқ па?  Оқыўшыларға «20.000 сўмнан ремонтқа ақша алып келиңлер», деп айтқан мектептен. Сонда мен үш перзентиме 60.000 сўм бериўим керек. Усы мәселени шешип бериўиңизди сорайман».

Kun.uz мүрәжат жоллаған әке менен сөйлескен, ол Телеграм-каналда берилген мағлыўматты және бир мәрте тастыйықлаған.

Мүрәжат каналда жәрияланғаннан кейин, Өзбекстан Республикасы Әдиллик министрлиги бул жағдайға өз мүнәсибетин билдирип, Халық билимлендириў министрлигине хат жиберген.

Бул жағдай бойынша «Өзбекстан Республикасы Әдиллик министрлиги Өзбекстан Республикасы Халық билимлендириў министрлигине нызамшылықтың төмендеги талаплары ҳаққында мағлыўматты жеткериўди зәрүр деп есаплайды», - делинген хатта ҳәм төмендеги талапларды санап өтеди:

«Бириншиден, Өзбекстан Республикасы Конституциясының 41-статьясына муўапық, ҳәр бир адам билим алыў ҳуқықына ийелиги ҳәм бийпул улыўма орта билим мәмлекет тәрепинен кепиллениўи белгиленген.

Екиншиден, «Билимлендириў ҳаққында»ғы Нызамның 4-статьясында жынысы, тили, жасы, расасы, миллий тийислилиги, исеними, динге мүнәсибети, социаллық келип шығыўы, хызмет түри, социаллық жағдайы, турар жери, Өзбекстан Республикасының аймағында қанша ўақыттан берли жасап атырғанынан бийғәрез, ҳәр бир адамға билим алыўда тең ҳуқықлар кепиллениўи белгиленген.

Үшиншиден, Өзбекстан Республикасы Президентиниң 2017-жыл 24-августтағы «Өзбекстан Республикасы Финанс министрлиги жанындағы бюджеттен тысқары Билимлендириў ҳәм медицина мәкемелериниң материаллық-техникалық базасын раўажландырыў фондын шөлкемлестириў ҳаққында»ғы ПҚ-3442-санлы қарарына муўапық, Финанс министрлиги жанындағы улыўма билим бериў мектеплери, кәсип-өнер колледжлери, академиялық лицейлер ҳәм медицина мәқемелерин реконструкциялаў, толық оңлаў ҳәм үскенелеў фонды ҳәм Жоқары оқыў орынларының материаллық-техника базасын раўажландырыў фонды тийкарында Өзбекстан Республикасы Билимлендириў ҳәм медицина мәкемелериниң материаллық-техника базасын раўажландырыў фонды шөлкемлестирилген.

Бул фондтың тийкарғы ўазыйпаларынан бири улыўма билим бериў мектеплери, кәсип-өнер колледжлери ҳәм академиялық лицейлерди, сол қатары, мәкемелик бойсыныўдағы, қурыў, реконструкциялаў ҳәм толық оңлаў, атап айтқанда, керек жағдайда оқыў корпусларын оқыў устаханалары ҳәм лабораториялар менен кеңейтиў, спорт заллары ҳәм майданшаларын, басқа инфраструктура объектлерин қурыў бойынша жумысларды қаржыландырыў есапланады.

Төртиншиден, Министрлер Кабинетиниң 2017-жыл 1-декабрьдеги 961-санлы қарары менен тастыйықланған Өзбекстан Республикасы Халық билимлендириў министрлиги ҳаққындағы Нызамға муўапық, халық билимлендириў мәкемелери имарат ҳәм комплекслерин қурыў,

Реконструкциялаў, ағымдағы ҳәм толық оңлаў жумыслары бойынша және оқыўшылардың билими ҳәм билим алыў сапасына тәсир ететуғын факторларды анықлаў бойынша системалы мониторинг алып барыў ҳәм тийисли илажлар белгилеўи керек.

Жоқарыдағы жағдайлар Халық билимлендириў мәкемелери искерлигинде жол қойылыўының алдын алыў мақсетинде барлық билимлендириў мәкемелери басшылары ҳәм муғаллимлерин нызам ҳүжжетлериниң талаплары бузылыўы мүмкин емеслиги ҳаққында ескертиўиңиз ҳәм әмелге асырылған жумыслар ҳаққында Әдиллик министрлигине мәлим етиўиңиз соралады», -  делинген Әдиллик министрлигиниң хатында.

 

Жуўмақлап айтқанда, мектеплер ҳәм басқа билимлендириў мәкемелери тәрепинен оңлаў ушын оқыўшылардан пул жыйналыўы нызамсыз есапланады ҳәм бундай жағдайлар нызамға муўапық қуўдаланады.

 

Дерек: kun.uz

 

Аўдарма: makan.uz

скачать dle 10.6фильмы бесплатно



  • 17-04-2018, 10:16 |
  • 570