Нөкисте президент мектеби ашылды

 

Нөкисте президент мектеби ашылды

 

Усы жыл 11-декабрь күни Нөкисте Президент мектебиниң ашылыў салтанаты болды.

Өзбекстан ҳәм Қарақалпақстан Республикаларының мәмлекетлик гимнлери жаңлады.

Илажда Қарақалпақстан Республикасы Жоқарғы Кеңесиниң Баслығы М.Ерниязов жыйналғанларды Президент мектебиниң ашылыўы Қарақалпақстан Республикасы Жоқарғы Кеңеси ҳәм министрлер Кеңесиниң атыннан қутлықлады.

Өзбекстан Республикасы Президенти Шавкат Мирзиёев орынларда әмелге асырылып атырған реформалар, дөретиўшилик жумыслары, ири жойбарлар менен танысыў мақсетинде 2018-жылдың 15-16 ноябрь күни  республикамызға сапары ўақтында барлық тараўлар сыяқлы билимлендириўге де айрықша итибар қаратып, елимиздиң ҳәр бир аймағында биреўден жаңа типтеги Президент мектеплерин шөлкемлестириў, бул жумысты Қарақалпақстаннан, Нөкис қаласынан баслаўды усыныс еткен еди. Елбасшымыздың 2019-жыл 20-февраль күни «Президент мектеплерин шөлкемлестириў илажлары ҳаққында»ғы қарары тийкарында бүгинги күни Ташкент, Наманган, Хийўа қалаларынан кейин Нөкис қаласында Президент мектеплери ашылды.

Нөкисте президент мектеби ашылды

 

Илажда сондай-ақ, Өзбекстан Республикасы Президенти кеңесгөйиниң биринши орынбасары А.Садуллаев, Президент, дөретиўшилик ҳәм қәнигелестирилген мектеплерди раўажландырыў агентлигиниң директоры С.Бабаходжаев ҳәм басқалар шығып сөйлеп, елимиз басшысының басламасы менен билимлендириў тараўын реформалаў, қәбилетли балаларды қоллап-қуўатлаў, олар ушын шараятлар жаратыў бағдарында әмелге асырылып атырған кең көлемли жумысларға тоқтап өтти.

Мектептиң биринши қоңыраўы қағылып, дәслепки сабақлар басланды.

Нөкисте президент мектеби ашылды

 

Президент мектебиниң қурылысы ушын жергиликли бюджет есабынан  67 миллиард сум қаржы ажыратылды. Атап айтқанда, заманагөй жойбар тийкарында 168  орынға мөлшерленген еки қабатлы оқыў имараты, усынша орынға мөлшерленген үш қабатлы жатақхана, барлық қолайлықларға ийе мийманхана, спорт заллары, бассейн, асхана, сабақ таярлаў ханалары оқыўшылардың хызметинде болады. Барлық зәрүр инвентарьлар Қытай Халық Республикасы ҳәм Түркия мәмлекетинен алып келинди.

Мектепте оқыў процеси қарақалпақ, өзбек тиллеринде алып барылады. Математика, физика, химия, биология ҳәм мәлимлеме технология пәнлери инглиз тилинде оқытылады. Жергиликли оқытыўшылыр менен бир қатарда Кениядан, Уллы Британиядан ҳәм Қубла Африкадан сегиз тәжирийбели қәниге мирәт етилди.

Нөкисте президент мектеби ашылды

 

Быйылғы жылы мектепке 7500 оқыўшы ҳүжжет тапсырған болса, соннан «жүзден жүйрик, мыңнан тулпар» дегениндей, Кембридж университетиниң халықаралық имтихан бөлиминиң тәжирийбели қәнигелери тәрепинен 144 оқыўшы таңлап алынды. Ҳәр бир класста еки топарға бөлинген ҳалда 12 оқыўшыдан жәми 24 оқыўшы билим алады.

-Усы оқыўшылардың қатарында мектепке қабылланғанымнан қуўанышлыман,-дейди Әмиўдәрья районынан Шахриёр Шомурадов.-Бул жерде терең билим алыўымыз ушын барлық шараятлар жаратылған. Келешекте Президентимиздиң биз жасларға билдирип атырған исенимин ақлаўға ҳәрекет етемен.

Нөкисте президент мектеби ашылды

 

-Мен бахытлы ата-ананың биримен,-дейди Нөкис қаласынан Алишер Қутлымуратов.-Себеби, балам Алпамыс Махмудов усы мектептиң бесинши класына жоқары баҳалар менен қабыл етилди. Перзентлеримизге бундай имканият жаратып берип атырған Президентимизге шексиз миннетдаршылық билдиремен.

Нөкисте президент мектеби ашылды

 

Илаж қатнасыўшылары Президент мектебинде оқыўшылар ушын жаратылатуғын шараятлар менен жақыннан танысты.

 

Д.АБИБУЛЛАЕВ,

Қарақалпақстан хабар агентлигиниң шолыўшысы.

скачать dle 10.6фильмы бесплатно



  • 11-12-2019, 20:21 |
  • 2 278